OLPELA kosa bilong Paris St Germain Thomas Tuchel husat i gat 47 krismas i bin senisim Lampard na kamap nupela menesa bilong Chelsea.

Thomas Tuchel i kamap nupela menesa bilong Chelsea Primia Lig klap bihain long ol i bin rausim Frank Lampard long Tunde.

Chelsea i bin rausim Lampard long namel bilong namba tu sisen bilong em. Em i bin brukim rekot bilong klap olsem namba wan Primia Lig menesa job.

Thuchel em olpela kosa bilong Borussia Dortumud na Paris Saint Germain. Em  i bin wanbel long sainim 18 mun kontrak wantaim tingting bilong narapela yia, long west London klap.

“Mi laik tok tenkyu long Chelsea long bilip long mi na wokmanmeri bilong mi,” Tuchel husat i bin bung wantaim ol pilaia long Chelsea Cobham trening hetkwata i bin tok.

“Mipela olgeta i gat bikpela rispekt long wok bilong Frank Lampard na ol hanmak bilong em long Chelsea. Long wankain taim tu, mi no inap wet long bungim ol nupela tim bilong mi na resis long futbal lig. Mi amamas long kamap hap bilong dispela Chelsea famili olsem nupela menesa!”

Dairekta bilong Chelsea, Marina Granovskaia i tok dispela i no isi wok long senisim ol kosa long namel bilong sisen. “Mipela i amamas long painim wanpela bilong Europe namba wan kosa bilong Yurop long Thomas Tuchel.

“I gat planti samting moa i stap long pilai na planti long kisim long dispela sisen na moa sisen long kam. Mipepla i welkamim Thomas long klap” , em i tok.

Tuchel i gat gutpela menesa pepa wantaim planti ekspriens long wok bilong em long kompetitiv lig. Em i bin givim bek –tu-bek Frans lig taitel na kisim las sisen Sempiansip Lig fainel tasol ol i bin rausim em na Maurivio Pochettino i bin kisim ples bilong em long Desemba.