Ol i bin kisim 7-pela nupela pilaia go insait long SP Hunters skwat bilong 2021 Intrust Super Cup salens.

Nem bilong ol em Jokedi Bire, Edwin Ipape, Benji Kot, Sylvester Namo, Gilmor Paul, Solomon Pokare,
Judah Rimbu, Jeffery Robert, Solo Wane na Samuel Yegip husat ol bai joinim ol narapela 22 ol pilaia
bilong tim na go pilai long Queensland Intrust Super Kap 2021 sisen.
Kosa bilong SP Hunters Mathew Church i tok ol i kisim ol dispela pilaia long talen na skil bilong ol we ol i
bin pefom long dispela sisen.
“Stail bilong ol pilaia na ol nupela gem rul em ol sampela ol samting we ol menesmen bilong tim i bin
lukim long kisim dispela fainel skwat bilong Hunters,” Kosa Church i tok.
SP Brewery Menesing Dairekta Ed Weggemans i laik tok amamas long Hunters 29-skwat husat ol bai go
pilai long Queensland.
Tok amamas i go long olgeta pilaia. SP Brewery i amamas tu long sapotim SP Hunter na tu long bungim
maus bilong Papua Niugini, em laik tokim ol pilaia long pilai gut long dispela sisen.
Siaman bilong PNG Ragbi Futbal Lig (PNGRFL) Sandis Tsaka i tok amamas tu long sapot bilong SP Brewery
na SP Hunters Bod we Stan Joyce i go pas long en na tu Minista bilong spot.
Em i tok tenkyu tu gen long wok bilong Stan Joyce na SP Hunters Bod long mekim gut relokesen rot na
lukautim ol pilaia i bai stap gut taim ol i go daun long Brisbane, Australia.
“Menesmen bilong SP Hunters i wokim ristraktsa long Hunters long apim nem bilong em na tu long
mekim em kamap kampani bilong em yet,” Tsaka i tok.