ETLETIKS PNG i bin sori long lusim Elanga Buala wanpela strongpela spot meri husat i bin dai long haus
bilong em long Lae las wik.

Wantaim Iammo Launa na Barbara Ingiro-Sapea, Buala i bin wanpela bilong ol pilaia husat i bin karim
nem bilong Papua Niugini long Olimpik Gem.
Em i bin statim wantaim volibal na bihain em i bin senis na kamap pilaia bilong etleliks taim em i winim
namba wan resis bilong ol meri long 100 mita Nesenel Sempionsip long Maunt Hagen. Na tu em i bin
winim olgeta sevenpela Nesenel taitel. Em i bin winim 100 mita long 1981 na 1982, 200 mita na 1983 na
1984 em 400 mita.
Buala i bin winim tu 13 Nesenel Sempionsip medol long laip bilong em olsem wanpela namba wan pilaia
na spots meri.
Long 1983 em i bin winim gol long 200 mita na 400 mita long Saut Pasifik Gems long Apia, Samoa. Na tu
em i winim 4-pela taim gol long 400 mita Rile, 4-pela taim gol long 100 mita Rile na brons long 800 mita
long Saut Pasifik Gems.
Taim em i wok long redi long go resis long Kalifonia, Amerika long 1983 em i brukim rekod bilong spot
bilong ran long 100 mita taim em i putim nupela mak long 12.22 sekens na kamapim PNG Nesenel Rekod
long dispela spots kod. Buala i holim dispela rekod long 10-pela de tasol na pren bilong em Barbara
Ingiro-Sapea i putim nupela mak gen long 12.19 sekens taim em i ran long Olympic Gems na rausim
dispela taitel long em.
Buala i pilai moa long 30 yia olgeta na inap nau em i stap olsem wanpela namba wan na strongpela pilaia
namel long olgeta etlits bilong ran.
Insait long ol pilai bilong ol Buala na pren bilong em Barbara Ingiro-Sapea i opim nupela taim bilong ol
meri long go insait long pilai bilong sprintin bilong ol meri long PNG.
Lukluk bek long laip stori bilong em ol famili, kosa bilong em, ol wan ples bilong em na ol wantok bilong
em i bin sapotim em long kamap wanpela namba wan pilaia na strongpela meri.