LONG resis long sel long bot long Olympic Gem long Tokyo, ol i kisim tupela plaia Te’Arikina Rose Numa.

Seila Te’ Airiki Numa na Rose Numa i save go trening long Australia tasol COVID-19 i mekim na ol i kam bek long PNG na i wok long trening i stap.

Dispela tupela barata na susa bai salens na karim nem bilong Papua Niugini long resis long sel long bot insait long 30 yia.

Taim ol i bin kisim tupela long go pilai long Tokyo Olympic gem, Te’ Ariki i lusim wok bilong em na Rose i lusim skul long las yia bilong em long Yunivesiti long trening na redi long Olympics.

Tupela barata na susa i bin go stap wanpela wik tasol long Brisbane long trening tasol COVID-19 i kamap bikpela na i ol kam bek long PNG.

Ol i no bin wanbel long bilong wanem ol i mas go stap 10 mun long trening gut na kam bek wantaim save, Te’ Ariki i tok.

Long Pot Mosbi i nogat Kosa o ol sampela lain long resis wantaim olsem na ol yet i save trening.

Rose Numa i tok em i hat long salens na kisim strong taim i nogat ol narapela ol seila insait long kantri bilong wanem em na barata bilong em tasol i tren long dispela kain spot.

“Sapos mipela go tren long Australia em bai gat bikpela helpim insait long trening bilong mi”, Rose i tok.

“Na tu long kamap long dispela kain mak na karim nem bilong kantri long Olympic Gem em bikpela samting insait long laip bilong mi na brata bilong mi”, Rose i tok.

UPNG Jenelis Sumatin Martina Takaneng i raitim