LONG kamapim gutpela senis we bai i stap longpela taim, PNG i mas lukluk long kirapim na sapotim ol spots program insait long ol skul.

Kepten bilong PNG Orchids, Elsie Albert i mekim dispela tok taim Wantok Niuspepa i bungim em long Papa komyuniti 3-pela wik i go pinis.

Albert i tok, “long PNG planti yangpela i save stat pilai spots taim ol i stap long 16 krismas na i go antap. Dispela em i hatpela taim bilong lainim.

“Em i orait ol i pilait tasol long wok wantaim dispela grup em bai i kisim planti taim na risos long lukim sampela gutpela na strongpela talen long spots.”

Ol kondisen bilong ol long pilai tu i no save gutpela na i no gat fultaim sapot na stia long helpim ol dispela yangpela, olsem na ol i save pilai nating tasol.

 “Tasol sapos PNG i laik lukim bikpela senis em i mas invest long spots na ol pikinini na bihain long sampela taim kaikai bilong dispela invesmen bai i gutpela tru.”

Em i lukim olsem ol liklik pikinini long elementeri skul i ken lainim long pilai ragbi na ol arapela spots na seim taim kisim ol arapela save long skul. Dispela em i gutpela taim tru long ol pikinini i lainim.

Rosa Koian i raitim