BIKNEM PNG Bowls Takuru 4s Kap i bin kisim gen K17,000 sponsasip long Benk bilong PNG na PNG Ports Cooperation Limited long las wik Fonde.

Ol i bin givim dispela K17,000 long PNG Bowls Asosiesen long sapotim Takuru 4s PNG Bowls Kompetisen.

Long wankain taim Benk bilong PNG i bin sponsa  long K10,000 taim PNG Ports i bin givim K7,000 long dispela gem.

Gavana bilong Benk bilong PNG, Loi Bakani na Clemn Kafare husat i bin makim PNG Ports, i bin holim han wantaim long givim dispela dami sek long PNG Bowls Presiden na olpela PNGDF Fos Segen Meja Retired Sif Warrant Opisa Joe Kamane long PNG Difens Bowling Klap long Murray Barracks.

Mista Bakani i amamas tru long givim dispela sek na i bin tok ol i redi long helpim na sapotim dispela tonamen long bihain taim. Mista Clemn Kafare i bin makim PNG Ports tu i bin soim wankain luksave. Em i tok PNG Ports tu bai kamap long lukim dispela bikpela bung long wiken.

PNGDF lepteneu Kenel Robbie Tanfa i bin makim maus bilong Difens Bowling klap na tok tenkyu long BPNG na PNG Ports Limited long sapotim dispela tonamen na em i tok gudlak long olgeta tim husat bai pilai long dispela tonamen.

I bin gat 24 tim pinis long dispela tonamen na planti bilong ol tim bai kam long ol arapela provins. Ol i bin opim long las wik Sarere long PNG Difens Bowling Klap.