LONG go fowat long PNG, ol yangpela i mas luksave long ol opsen bilong ol.

PNG Orchid tim kepten, Elsie Albert, i bin mekim dispela tok taim Wantok Niuspepa i bungim em long Papa Komyuniti long Hiri Wes, Sentral provins i no longtaim i go pinis. Albert i bin joinim PNG Hai Pefomens Tim long ragbi kosa klinik long Papa.

Albert i tok spots em i wanpela gutpela opsen bilong ol yangpela.

“Ol yangpela i ken go skul na long wankain taim ol i mas tingim spots.

“Spots em i gutpela long wanem em i helpim long stretim tingting bilong yumi. Em i helpim tu long senisim tingting bilong ol man long ol meri na tingim yumi ol meri olsem ikwal.

“Insait long spots ol yangpela i ken painim nupela mining long laip bilong ol na ol i ken lusim pasin bilong smok, spak brus, dring hombru na ol pasin we i save daunim ol, Albert i tok.

Albert i greduet wantaim diploma long Tropikel Egrikalsa long 2018 long University of Natural Resources, (UNRE) long Is Nu Briten, tasol spots i pulim em na em i putim olgeta tingting bilong em long kamap wanpela star long spots. Na bekap bilong em, em skul em i kisim pinis long UNRE.

Nau em i pilai wantaim St George Illawara Dragons long Sidni, Australia na wankain taim em i kepten bilong PNG ragbi tim bilong ol meri.

Em i tok no gat wanpela samting em bai i kam isi. Yumi mas wok hat, givim taim na mekim komitmen long kamap long wanpela mak.

Rosa Koian i raitim