OL pilaia bilong SP Hunters Junior Rop, Joe Joshua na Anderson Benford husat ol i bin joinim Lae Snax Tigers olgeta i bin skorim tupela, tupela trai long help ol winim Tigers Sentral Dabaris 40-10 long Pot Mosbi.

Dispela raun 2 bilong win long Sir John Guse Stedium i lukim ol Digicel Kap difending sempien i laik strongim taitel bilong ol long statim sisen wantaim win. Ol i bin win Waghi Tumbe 28-8 long raun 1 na raun 2 ol i bin daunim Sentral Dabaris 40-10.

Aninit long lidasip bilong skipa bilong Tigers Tiger Emere, ol i bin pusim ol Tigers pilaia  i go moa wantaim ol Dabaris long soim belat bilong ol long statim gem.

Tasol Dabaris i bin asua na strongpela beklain bilong ol Tigers Joe Joshua i bin opim wantaim namba wan trai.

Inta senis fowat bilong Tigers Rop na Benford tu i bin skorim namba wan trai bilong tupela long namba wan hap bilong gem long helpim ol Tigers long go pas wantaim poin 10-0.

Ol Dabaris i bin statim namba tu hap long fut wantaim winga bilong ol Yanis husat i bin skorim wanpela trai na mekim gutpela kik klostu hap taim.

Tasol Tigers hitim bek wantaim Rop husat i skorim namba tu trai gen insait long 60 minit na tim meit bilong em Jokadi Bire i bin katim na putim wanpela moa trai apim poin 30-6.

Fulbek bilong Tigers Joe Joshua husat i bin saitim ol Dabaris namel long fil na skorim namba tu trai bilong em insait long  8 minit bilong fultaim, wantaim Gerry Ware bilong Dabaris husat tu i bin brukim difens bilong Tigers na putim namba tu trai bringim skoa 36-6.

Tasol  dispela i bin stopim Tigers taim Benford i bin daunim fulbek bilong Dabaris Murphy Eddie na putim namba tu trai bilong em long pinisim raun 2 resis.

Ol poin bilong las wiken Sarere, Julai 11 – Vipers 12 Lahanis 10, Cutters 14 Tumbe 4; Sande, Julai 12 – Wigmen 19 Mioks 18, Muruks 22 Eagles 18, Tigers 40 Dabaris 10, Gurias 38 Isou 2.

Jacklyn Kimala i raitim