PAPUA Niugini i nidim Spot Revolusen na dispela bai stat wantaim ileksen bilong nupela Bod long PNG Olimpik Komiti long Jun 27.

Dispela bai kamap bikos Nesenel Federesen (NF) i no wanbel long wok bilong ol PNGOC.

Presiden bilong Etletiks PNG Tony Green i makim maus bilong grup na i tok Nesenel Federesen i bin kisim nupela tingting long taim na dispela i mas senis sapos ol i laikim spot bai go het long narapela mak. Ol PNG Olimpik Komiti em kamap long Spot Bodi tasol ol PNGOC i no save bihainim laik bilong membasip, bikos ol i no bihainim polisi bilong Nesenel Federesen long divelopim na groim wan wan spot. Planti i bin askim olsem wanem PNG Spot Faudesen na PNGOC polisi i save lukautim spot long PNG.

Mipela olgeta i save long Etletik tasol husat bai lukluk long nid bilong NF, moa na moa spot askim long sapot tasol i no gat inap sapot long sapotim ol. Mipela olgeta i save long gutpela Kopret Gavenes na Komlaens bilong PNGOC tasol olgeta spot wok i mas kamap gut na dispela i save kamap gut taim PNGOC na PNGSF joinim han na wok bung wantaim Nesenel Federesen.

Liklik namba bilong spot em laki bikos Intenesenel Bodi na ol membasip lain bilong ol i gat planti mani i ken ranim na sponsa tasol tingim ol planti grasrut spot. Wanem kain rot nau bai yumi mekim long lukim pefomens bilong dispela ol spot long edministresen na gavanens sait long selektim ol pilaia.

Nau ol i no gat wanbel namel long PNG Spot Faundesen na ol PNG Olimpik Komiti na givim hevi long ol spot wantaim ol Olimpik Komiti. Dispela Faundesen na ol Olimpik Komiti nid long kam klostu wantaim spot sapos PNG i laik luk fowat long narapela mak long meja intenesenel spot gem.

Nesenel Gavman i save mekim baset moa long milien kina olgeta yia bilong Spot tasol Nesenel Federesen i no save kisim wanpela samting long dispela. Planti samting ol nidim long mipela tasol wanem samting bai mipela kisim bek long ol. Long las yia Nesenel Gavman i bin tokaut long riwot bilong etlit husat i bin winim medol long Intenesenel Gem. Nesenel Federesen i bin hatwok bikpela long helpim ol winim medol tasol no gat wanpela samting NF kisim bek.