PRK Mendi Muruks tim i senisim hap bilong trening long las wik.

Dispela senis i kamap bikos planti pilaia i nid long trening wantaim skil bilong ol long traim Digicel Kap gen dispela yia.

Olgeta pilaia em bilong as ples Mendi yet tasol wan wan em bilong nabis husat i joinim skwat tasol fainel skwat i no kam aut waitim SOE oda.

Muruks em wanpela bilong ol Digicel Kap tim husat i redi long salens dispela yia na lukim husat i ken autim difending sempions Lae Snax Tigers.

Dispela spot em bodi kontek gem olsem olgeta pilaia bilong klap i mas fit long pilaia no gut ol kisim bagarap long fil.

Ol statim trening bilong ol long Lae wan wik nau na ol bai stap liklik bihain long go bek long Mendi.

Planti salens na hevi kamap long sait bilong seleksen tasol klap i luk fowat long resis dispela yia wantaim ol sampela nupela talen pilaia.

Bikpela tingting bilong klap em long trening ol pilaia gut na bai ol soim insait long fil na apim nem bilong klap.

Long olgeta gem wanpela tim i save win na wanpela i save lus, olsem na Muruks i wanbel sapos ol lus o win em gem tasol.

Yumi olgeta tim i pilai wantaim amamas bikos wanpela tim tasol bai winim 2020 taitel. Bikpela samting em ol pilaia bilong mipela i mas pilai seif wantaim gutpela pasin long divelopim lidasip insait long gem wankain olsem intenesenel mak.

Jacklyn Kimala i raitim