WOL namba wan long tenis pilaia, Novak Djokovic bai stap ausait long Serbia tim long ATP Kap long Sydney long dispela wik Sarere.

Kain kain tok i bin kamap taim em i tokaut olsem em bai i no inap kisim veksin bilong COVID-19 na pilai long ol bikpela tonamen. Dispela disisen long stap aut long ATP Kap i mekim planti lain i tingting planti sapos em bai pilai long Australian Open (AO) klostu olsem tupela wik bihain. Ol ogenaisa bilong tim Serbia i tok wol namba 33, Dusan Lajovic bai go pas long tim Serbia long dispela tonamen long Melbourne Park. Ol ogenaisa bilong Australian Open i tok olgeta pilaia i mas kisim COVID-19 veksin o ol i mas kisim medikol eksemsen setifiket long ol dokta ausait long tim bilong ol long stap long dispela tonamen. Tonamen Dairekta Craig Tiley i tok olgeta pilaia na opisal husat i kam long dispela tonamen i mas kisim veksin na liklik lain tasol bai i mas gat medikol ekseminesen setifiket. “Sapos Novak i kam long Australian Open, em mas kisim COVID-19 veksin o em i mas soim medikol eksemsen setifiket. “Em i laik bilong em na praivet laip bilong em wankain olsem yumi olgeta. Mipela i no inap fosim em o askim em long toktok long dispela,” Tonamen Dairekta Tiley i tok. Wan tim pilaia bilong em Dusan Lajovic i tok Djokovic i gat bikpela laik long pilai long AO long difendim taitel bilong em. “Em (Djokovic) i tok em bai i no inap kam long ATP Kap. Em bai traim long kam long AO,” Lajovic i tok. Djokovic i les long tokaut sapos em i kisim veksin o nogat. Tasol em i bin toktok strong long bilip bilong em long ol etlit i mas gat rait long mekim samting ol i ting bai orait long laip bilong ol. Planti wol pilaia i kamap pinis na i redi tasol long dispela gem. Difending wimens sempion Naomi Osaka i stap pinis na i wok long trening i stap.  Frans Open fainelis Anastasia Pavlyuchenkova i tokaut olsem em i test positiv long COVID-19 bihain long em i kamap long Australia na nau em i stap long kwarentin.