LONG taim Pacific Games i kamap long Solomon Ailan long 2023, kantri i laik lukim ol etlit bilong em i kisim planti medol olsem na ol lokal spot kosa i wokbung nau wantaim ol studen bilong wanpela yunivesiti long Australia long helpim ol etlit i redi nau.

Tasol long taim COVID-19 i pasim boda bilong Solomon Ailan na Australia dispela wok redi i no bin isi long mekim. Ol Exercise and Sports Science studen bilong Bond University long Kwinslan i wok wantaim Solomon Islands Sport Leadership Institute (SISLI). “The students have been doing some needs analyses of some of the sports,” said Dr Justin Keogh, an Associate Professor of Exercise and Sports Science at the Bond University in Queensland. “Mipela i bung wantaim sampela kosa na bai i gat moa wok i kamap, toktok wantaim wan wan het kosa strongim ol kosa, fisioterapis na luksave long talent bilong ol woka. Helpim ol dispela lain long givim gutpela sevis long ol etlit.” Long 2019 Pacific Games long Samoa, Solomon Ailan i bin kisim 36 medol, foapela bilong ol em ol gol medol. Ol i bin stap long namba 13 ples long poin lata bihain tru long Nu Kaledonia na Papua Niugini na ol liklik kantri olsem Nauru na Kiribati. Dr Keogh i tok i gat bikpela sans long strongim ol etlit bilong Solomon Ailan na em i hop dispela wokbung namel long Australia na Solomon Ailan bai karim kaikai. “Ol etilit bilong Solomon Ailan i wok strong long taim i no gat bikpela sapot. Mipela i bilip olsem dispela sapot ol i kisim nau bai apim mak bilong ol etlit long Solomon Ailan, “ em i tok. Wanpela studen bilong Bond University, Amy McGaw em i wanpela bilong ol tripela studen husat i wok wantaim ol kosa bilong Solomon Ailan. “Mipela i lukluk long fitnes level bilong ol, wanem kain wei ol i muv na mipela i givim infomesen long ol kosa long helpim ol i kamapim ol stretppela trening program,” em i tok. “Ol i ken wokim ol trening program bilong ol long dispela infomesen mipela i givim long ol.” Em i wok wantaim Zinnia Leamana, husat i kosa bilong Strength and Conditioning na em i tok ol i lainim nupela skil na aidia long helpim long apim mak bilong ol etlit bilong ol. Aaron Alsop, Ekseketiv Dairekta bilong HighPerformance Program long Solomon Islands National Sports Institute, i bin helpim long stretim dispela wokbung.