LONG taim soka pilaia, Christian Eriksen i airaun na pundaun long fil, tim dokta bilong Denmark, Morten Boesen i luksave olsem sapos em i no wok hariap, bai Eriksen i dai long fil.

"Em i wok long pulim win na mi pilim lewa bilong em i wok long pam i stap. Tasol i no longtaim olgeta samting i senis na mipela olgeta lain i stat long givim CPR long em."

Long 10-pela minit, bikpela pret tru i bin kamap long wanpela soka gem bilong European Championship. Ol dokta i traim strong tru long mekim lewa bilong Eriksen i wok gen na ol wan-pilaia bilong em i go sanap raunim em na planti bilong ol i wok long krai. Ol sapota tu i no mekim nois bikos ol i luksave olsem bikpela hevi i kamap long fil.

Bihain long sampela taim, Eriksen i opim ai na toktok wantaim Dr Boesen na ol i kisim em i go long haus sik.

Soka Federesen bilong Denmark i tok Christian Eriksen i wok long kamap orait nau long haus sik long Copenhagen.

Em i bin airaun na pundaun, 43 minit long gem bilong Denmark egensim Finland. Referi i bin stopim gem inap 90 minit bihain long dispela hevi, tasol tupela tim wantaim i wanbel long pilai i mas gohet gen.

Finland i winim gem 1-0 bihain long Joel Pohjanpalo i skoa long 60 minit tasol golkipa Lukas Hradecky i sevim penalti kik.

Tasol ol pilaia bilong Denmark i no wari tumas long dispela skoa.

"Ol i no inap pilai gut long taim tingting bilong ol i paul," kosa bilong Denmark, Kasper Hjulmand i tok.

"Mipela i no ting bai mipela inap pilai gen, tasol ol pilaia i go aut na pilai long namba tu hap.”

UEFA i tok tupela tim i bin holim imejensi miting na tokorait long pilai i gohet. Na long taim ol i go bek long fil ol sapota i singaut amamas na paitim han.

Hjulmand i tok ol i askim tupela tim sapos ol i laik pinisim dispela gem o stopim na pilai gen long Sande. Olgeta i wanbel long pinisim gem long Sarere yet.

Eriksen i bin wokim sotpela pas na em i pundaun i go daun long graun. Ol wan-pilaia long tim i lukim olsem na ol i singaut long ol dokta na ol i ran i go hariap long helpim em.

Meri bilong em, Sabrina Kvist Jensen, i ran i go insait long fil long taim em i lukim man biong em i pundaun.

Eriksen em i wanpela midfil pilaia bilong Inter Milan na tim dokta, Piero Volpi, i tok Eriksen i no bin kisim COVID-19 na em i no gat hevi long bodi bilong em. Em i bin pas long olgeta medikol test bilong em longtaim em i bin lusim Tottenham na joinim Inter long Janueri 2020.

Eriksen em i wanpela bikpela sta soka pilaia bilong Denmark.  Na long taim em i bin pundaun long fil, ol 15,000 sapota husat i bin go lukim dispela gem long Parken Stadium i bin kirap nogut. Planti bilong ol i wari na krai long en.