PAPUA Niugini Nesenel Ragbi Lig Bod i surukim deit bilong 2021 Digicel Kap kompetisen i go long Me 29, bihain long bod miting long las wiken.

Siaman bilong PNGNRLC Adrian Chow i bin tokaut long ripot olsem ol surukim deit bilong kompetisen bikos memba long wanpela bilong  ol Digicel Kap tim tes COVID-19 positiv bihain long olgeta opisal na pilaia bilong tim i bin kisim tes.

Siaman Chow i tok ol tim i bin yusim RTD Antijen long tes pastaim long ol bin kam long Pot Mosbi bihainim trevol rikwaimen bilong olgeta tim.

“Bihain long tes ol bin painimaut olsem tupela memba bilong tim tes positiv taim ol arapela memba i bin klia olsem ‘negetiv’, Chow i tok.

Dispela tupela positiv memba i bin go stret long aisolesen long painimaut moa taim ol arapela memba bilong tim ol putim long ‘bubble-aisolesen’ inap 14 de”.

“Mipela i bin komit long helt na welbing bilong ol pilaia, opisal, pren na sapota; na ol bikpela komyuniti long Papua Niugini,” Siaman i tok. “Olsem na mipela i mekim disisen long surukim dispela 2021 Digicel Kap sisen i go long Me 29, 2021.”

Em i tok dispela em strongpela disisen. “Mipela mekim dispela bilong rispektim gem, ol stekholda long dispela taim no gut,” Chow i tok.

Ol PNGNRLC na PNGRFL nau i wok klostu wantaim Nesenel Pandemik Kontrol Senta na ol PNG Spot Faundesen Pandemik Komiti long luksave long menesmen bilong dispela taim long mekim dispela kompetisen i ken stat long seit envaironmen.