PAPAU Niugini Ragbi Futbal Lig (PNGRFL) i bin setim tasol Epril 24 o 25 long statim 2021 ragbi lig sisen bihain long ol kisim tok orait i kam long opis bilong Pandemik Kontrola.

CEO bilong PNGRFL Stanly Hondina i tok Kontrola David Manning i bin tokaut las wik long namba bilong COVID-19 keis i go antap tru olsem em givim olgeta wanpela mun long bihainim gut COVID-19 Protokol.

“Mipela long PNGRFL i laik olgeta sitisen long PNG mas rispektim dispela nupela COVID-19 mesa na bihainim gut lo ‘Nupela Pasin’ protokol,” Hondina i tok.

“Mi bin salim dispela protokol i go long opis bilong kontrola long tok orait, long ol 12x Digicel Kap Frensais, ol afiliet lig na ol skul long kantri i ken stat redi na trening long kik ov long wiken Epril 24 na 25, 2021,” Hondina i tok.

 “Dispela em wantaim ol trael sisen mets wantaim  no gat trevol i go long narapela provins long neks foapela wik.

Em i tok ol Digicel Kap i bin namba tu ragbi lig kompetisen long wol bihain long Australia NRL i bin pilai long 2020 bikos long COVID-19 pandemik lokdaun.

 “PNG Nesenel Ragbi Lig Kompetisen (PNGNRLC) i bin menesim ol Digicel Kap frensais dro, trevol, akomedesen na olgeta asosiet ektiviti bin pas aninit long Banis Protokol wantaim no gat wanpela ripot bilong dispela vaires,” Hondina i tok.

 “Mi i amamas long sapot na koperesen bilong dispela Opis bilong Pandemik Kontrola na wokmanmeri, PNGSF, ol Digicel Kap frensais, ol stekholda na patna na ol ragbi lig famili na sapota long PNG long gutpela sapot,” Hondina i tok.

Em askim olgeta frensais, lig na skul long lukim dispela nupela keis inap ol kisim tok orait long Opis bilong Kontrola.

“Stat long nau olgeta frensais, plis ritim gut na save wantaim olgeta Banis-Gem De, Klap, Pilaia na Medikol-na bihainim ol Protokol.”