YUNAITET sios long Is Papua Distrik i lusim wanpela longtaim pasto. Dispela em Pasto Kini Pokana husat i bin dai long Kalo viles, Rigo, Sentral provins long las wik.

Rait Reveren Malaga Bouraga, Bisop bilong Papua Galp Rijon i bin go pas long lotu bilong Pasto Pokana long Mande dispela wik. David O’Paki i tok kandre bilong em Pasto Pokana i wanpela gutpela wokman bilong sios na i wanpela gutpela lida. Em i tok ol famili i lusim wanpela gutpela memba. Em i strongim tingting bilong ol famili na ol memba bilong sios husat i save long Reveren Pokana olsem samting Bikpela i givim, em i mas kisim bek. Em i tok Pasto Pokana i save laikim olgeta manmeri na i laik bungim olgeta maski yu bikpela o liklik manmeri. Em i pre olsem Bikpela i givim gutpela malolo long sol bilong Pasto Pokana na givim bel isi long famili. Em i kisim dispela taim long toksave tu olsem bikos long dai bilong Pasto Pokana, Ivangelisim Trening Program we i mas kamap long Pot Mosbi long dispela wik em ol i surukim i go long neks yia, 2022. Pasto Pokana i bin go long Rarongo Tiolojikal Koles long 1973 na bihain i go wok klostu long olgeta hap bilong Papua Niugini, planti bilong ol yia long Papua Rijon.