POP Francis i askim ol bilip manmeri long pre long ol refuji.

Em i tok dispela kain ol lain manmeri i laikim tru helpim bilong yumi.

Vatican Nius i ripot long Mande dispela wik na long taim Pop Francis i tingim 130 refuji long Afrika husat i ranawe long kantri bilong ol bikos ol i pret long laip bilong ol tasol i lusim laip bilong ol long Mediterrean solwara taim bot ol i go long en i kapsait.

Em i tok yumi i mas sem long yumi yet, kain ol pasin yumi save mekim long ol arapela brata susa bilong yumi.

Em i tok Jisas tu long laip bilong em i bin stap wanpela refuji taim Joseph na Maria i kisim em na i ranawe i go long kantri Isip bikos King Herod long dispela taim i laik painim na kilim em.

Pop Francis i tok bikos long dispela yumi i mas oltaim tingim ol refuji husat tu i bungim hevi long laip bilong ol bikos sampela lain i no laikim ol.

Em i mekim dispela tok tu long taim em i mekim prea bilong Regina Coeli long Vatican.

Regina Coeli prea i min Kwin bilong Heven na prea i go long Maria.

Ol Katolik i mekim dispela prea long givim ona i go long Maria husat i mama bilong Jisas tasol i mama bilong yumi ol pipel.

Olsem yumi mas askim em long helpim yumi ol manmeri long graun long strongim yumi long bihainim gut ol tok bilong Jisas.

Pop Francis i tok dispela prea i gutpela bikos em i givim preis i go long Jisas husat i kirap bek long i dai.

Long foapela wik tasol i go pinis sios i bin amamasim Ista Sande long makim kirap bek bilong Jisas long dai.