Ol pipel long Asaro Rurel Helt Senta long Daulo distrik long Isten Hailans i amamas long ol gutpela senis i kamap insait long operesen long hap bilong ol bilong ‘UPNG School of Medicine and Health Sciences’ i go pas long en, long wanpela raun bilong ol.

Sape Metta i raitim

Ol lokel pipel wantaim ol helt wokmanmeri long Asaro Rurel Helt Senta long Daulo distrik long Isten Hailans i bin lukim sampela gutpela senis i kamap insait long operesen na ol arapela helt sevis long hap bilong ol.

Dispela em long taim moa long 20 sumatin wantaim ol tisa na opisa bilong ‘UPNG School of Medicine and Health Sciences’ i go long kisim sampela skul na kamapim ol helpim tu long dispela helt senta.

Dispela ol sumatin em UPNG i bin makim ol long i go long stap insait long dispela program bilong trening na tu lainim ol pasin bilong helt long Asaro helt senta.

Tim lida makim ol sumatin, Matson Aru long taim bilong pinis bilong dispela wanpela wik program i tok amamas olsem ol sumatin i bin lainim planti samting we ol bai ken putim long wok bihain taim ol i pinisim skul bilong ol.

“Long wankain taim tu mipela i luksave long nid bilong dispela helt senta, na i luk olsem ol arapela helt senta tu i gat wankain nid long bringim stendet bilong helt sevis i go antap we olgeta lain long ol rurel komyuniti bai ken kisim helpim long en,” Mista Aru i tok.

Em i tok taim ol sumatin i luksave olsem helt senta i no gat insinereta o ples bilong kukim ol pipia bilong haus sik na weist menesmen o rot bilong lukautim na rausim gut ol pipia bilong haus sik, ol yet i kirap mekim.

Long wankain taim ol i baim masin bilong katim gras, spet na ol arapela samting bilong klinim ol samting insait long banis bilong helt senta.

“Dispela em i namba wan taim long kain program i kamap we ol sumatin long UPNG i kamap wantaim kain progrem long stap insait long helpim na sapotim ol helt senta, na mipela i lukluk nau long surukim dispela program i go aut long ol arapela senta long PNG tu,” Mista Aru i tok.

Sinia Helt Ekstensen Opisa (HEO) bilong Asaro Helt Senta, Kum Topma i tok amamas tu olsem dispela ol sumatin i no kam long kisim skul na save tasol, ol i bringim sampela ol gutpela samting wantaim ol i kam tu.

“Olsem wanpela helt senta we i operet wantaim ol arapela helt senta long 8-pela distrik long provins, mipela i nidim planti ol samting long kamapim na impruvim tu ol sevis long ol helt senta.

“Antap long dispela mipela i sot tu long planti samting, na mipela long Asaro Helt Senta i laik tok amamas long dispela gutpela tingting bilong ol sumatin husat i kamap wantaim dispela tingting long helpim mipela long bildim insinereta na tu givim moa helpim long sait bilong weist menesmen long helt senta bilong mipela,” Mista Topma i tok.

PINIS.