Ol Komyuniti Helt Woka Asosiaisen (CHW) i makim nupela ekseketiv bilong ol bihain long 28 yia.

Lina Keapu i raitim

 Ol Komyuniti Helt Woka Asosiaisen o CHW husat i save werim blu yunifom long haus sik, i makim nupela ekseketiv bilong ol bihain long 28 yia.

Nupela Presiden bilong asosieisen, Angela Longai i tok, dispela senis bilong ekseketiv em i kam taim ol memba i painim aut olsem ol i no save kisim ol ripot bilong mani ol i save rausim long pei long go long akaun bilong asosieisen, na lukluk long wok bilong ol memba.

Misis Longai i tok, dispela i kirapim tingting bilong ol memba long makim ol niupela lida long lukluk long ol hevi bilong ol.

“Nau yet mipela i no save amas mani asosieisen i gat long wanem mipela i no lukim wanpela ripot.

“Mipela i save sainim ol agrimen bihain long tupela yia tasol dispela i no kamap long yia 2013 i kam long 2021 na mipela i lukim olsem em i no stret.

“Pastaim ekseketiv tu i no save senis, ol yet i save senis i go kam.

“Presiden i save stap i go senis kamap Tresa, na Tres i kamap Presiden.

“Dispela i go longpela taim tumas na mipela pilim olsem i em mas stop nau olsem na ol i makim mi olsem presiden wantaim ol narapela tripela, tasol ol i go stap wantaim ol olpela lain gen,” Misis Longai i tok.

Misis Longai i tok, nau yet ol memba i no save long rait bilong ol olsem memba, ol i wok nating.

“Long olgeta memba long PNG, sampela memba long ol arapela provins i kam na mipela i makim ol nupela ol ekseketiv long lukautim asosieisen.

“Dispela bung we mipela olgeta i kam stap long en, i namba wan bung bilong mipela long wanem mipela i no save bung long wanwan yia,” em i tok.

Ol nupela ekseketiv bilong asosieisen em, Misis Longai olsem president, sinia vais presiden em Elizabeth Punupo, vais presiden em Maria Hay, Tresara em Rose Kau na Sekretari em Mirriam Maru.

Dispela lain i kisim ples bilong Jeneral Sekretari James Amuna, Presiden Deck Issac, na Tresara Aika Nes husat ol i bin holim dispela ol posisen moa long 20 yia.

Misis Longa i tok, ol niupela ekseketiv em ol memba i kam bilong Mosbi na ol arapela provins.

PINIS.