Omicron i stap yet. Em i wilwilim ol pipel long Saut Afrika na long Inglan ol i putim bikpela was long dispela sik. Long Fiji bihain long ol i opim dua gen long ol turis ol i go insait long hevi bilong Omicron. 

Long PNG ol Nesenel Helt Dipatment ripot long 2 Janueri, 2022 i soim nogat nupela keis ol i lukim long dispela de. Nesenel Helt Dipatmen bai bringim marasin bilong COVID-19 i kam.

Dispela bai helpim long givim opsen long ol pipel long kisim veksin taim ol i no sik tasol ol i laik banisim ol yet o kisim marasin taim ol i sik. Planti spots i redi long go bek long pilai nau.

Ol i tok ol bai bihainim Nupela Pasin long ol spot kod bilong ol. Hevi bilong sot long ol haus sik i stap yet. Long pinis bilong 2021 bikpela toktok i go i kam long gavman i pasim ol City Pharmacy Nesing Stesin. Tasol sampela lida na ol pipel i pipel dispela sevis i sevim gut ol pipel na i no ken pas.

Long dispela nupela yia taim yumi tingim COVID-19 na ol variant bilong en, yumi no ken lus tingting tu long ol arapela sik i stap. TB em i stap namba wan sik we i wok long kilim planti pipel na HIV/AIDs na malaria tu i mas gat luksave long ol.

Lukluk bek long yia bilong COVID-19 planti bagarap i kamap. Planti indai i kamap long dispela sik. Long wankain taim planti famili long taun i lukim papa o mama i raus long wok na ol i kisim bikpela taim long sait bilong kaikai, basfe na ol arapela nid bilong stap long taun na siti.

No ken lus tingting long COVID-19. Em i stap na em i kamapim bikpela bagarap pinis. Tok i stap pinis. Bihainim Nupela Pasin na abrusim dispela kus nogut.