MINISTA bilong Edukesen, Jimmy Uguro i tok gut lak long olgeta Gret 8, 10 na Gret 12 sumatin husat i sindaun long Nesenel eksam bilong ol.

Ol Gret 10 i stat pinis long dispela wik na bai pinis long tumora Fraide 8 Oktoba. Neks wik na wik antap i de bilong ol Gret 12 na 8 eksam. Uguro i tok eksaminesen em spesel taim long laip bilong wan wan Gret 8, 10 na Gret 12 sumatin bikos dispela eksam  i save kamap long wanpela taim tasol long laip bilong ol sumatin. Em i tok sumatin i mas givim moa taim long stadi na redim gut tingting bilong ol pastaim long ol i sindaun long eksam. Em i salim tok tenkyu bilong em i go long olgeta tisa long ol skul long PNG long taim ol i givim long skulim ol sumatin. Em i tok wok tisa em wanpela spesel wok bikos wanem ol skul toktok na stia tok ol tisa i mekim long klasrum i save go pas long ol sumatin long redim laip bilong ol Uguro i salim tok tenkyu bilong em tu long olgeta papamama bilong ol sumatin long sapot ol i givim long ol pikinini bilong ol. Long wankain taim, em i tokim Wantok Niuspepa olsem em wantaim Seketeri bilong Edukesen, Dokta Uke Kombra i stap baksait long manmeri i mas kisim sut marasin long banisim ol yet egensim sik coronavirus (COVID-19). Em i tok tupela i bin stap long kisim sut marasin o veksinesen em Johnson na Johnson (J&J) long Mosbi. Bihain long em i bin kisim sut marasin em i salim givim toksave i go long olgeta tisa long PNG long ol i mas mekim disisen long kisim sut marasin long banisim ol yet na famili bilong ol egensim COVID-19. Em i tok nupela strong bilong COVID-19 ol i kolim Delta Variant i no save kaunim man o meri sapos ol strongpela manmeri o nogat. “Sik i ken kisim ol manmeri na kilim ol i dai. Em i no save kaunim manmeri,” Uguro i tok. “Gavman i no givim strongpela oda olsem lo we olgeta pipel i mas kisim banis sut egensim COVID-19. “Bikpela samting em disisen i stap long yu wan wan man o meri long kisim banis sut long stopim COVID-19 long bagarapim yu wantaim famili bilong yu.”

James G. Kila i raitim