OL pipel i mas kisim veksinesen long stopim Delta Variant long go bikpela. Bipo Gavana bilong Madang Sir Peter Barter i tok ol manmeri i no bihainim nupela pasin bilong stopim sik COVID-19 long go bikpela. 

Na tu mipela i no tokim ol manmeri gut long wanem samting COVID-19 bai mekim long yumi taim planti namba manmeri i kisim dispela sik. “Planti manmeri i dai long ol kantri olsem Indonesia, Fiji na Australia. Olgeta hap i gat lokdaun na ol manmeri i no raun natingtnating,” Mista Barter i tok. Em i tok, “Wantaim helpim bilong veksin namba bilong manmeri husat i kisim sik i no go bikpela . Planti evidens i soim olsem veksin em i helpim long stopim sik long go bikpela. Ol manmeri husat i kisim veksin i no kisim sik na ol lain husat i no kisim veksin i wok long kisim sik COVID-19 i stap Mista Barter i tok moa, Planti manmeri i kisim ol giaman infomesen long sosel midia na intanet na i no laik long kisim veksin.  Yumi mas i gat ol askim olsem yumi i redi long pait wantaim dispela sik Delta Variant o nogat? Planti manmeri long ol arapela kantri i laik tru long kisim veksin tasol yumi i no laik long kisim. Gavman i mas mekim sampela nupela toktok olsem, olgeta helt wokmanmeri  na tu ol bikpela institut i mas kisim veksin. “I luk olsem ol trenspot sistem i bai askim ol manmeri long kisim veksin pastaim na bai ol i helpim ol long kisim ol go i kam long ol ples,” Mista Barter i tok.

Samantha Solomon i raitim