OL Distrik i stap longwe long ol taun na siti i painim hat long kisim gavman sevis. Ol dispela distrik i nidim moa fans long transpotim ol guds na sevis bilong ol long trak, sip na balus i kisim i go kamap long eria ol i laik kamapim projek.

Planti bilong ol dispela distrik i stap long kostal na hailens provins we i nogat rot na ples balus na gavman sevis i no stap long en. Ol pipel i nidim infrastraksa, sot long marasin, besik helt ikwikmen, edukesen fasiliti, ol tisa na helt woka wok long go long ol taun na siti bikos nogat gutpela rot koneksen. Nesenel gavman i fokas tasol long ol eben senta na i lustingting long ol rural komyuniti we bikpela ol lain pipel i stap long ol asples. Dispela i soim long Distrik Sevis Impruvmen Program enuel fans akwital bilong Midel Ramu distrik bilong Madang provins. Ol i bin givim long Dipatmen ov Implementesen na Rural Divelopmen (DIRD) long las wik. Midel Ramu distrik edministresen i bin bungim bikpela salens long taim ol i save ogenaisim logistic olsem long trenspotim bilding meteriel bilong helt, edukesen na ol infrastraksa projek. Lokol MP Johnny Alonk i tok ol distrik edministresen i save satarim MAF balus long Mt Hagen long trenspotim ol bilding meteriel i go long ol projek hap bilong distrik. Em i tok dispela em i bikpela na ekspenses eksesais na mani nesenel gavman i save givim distrik i no inap long karim aut dispela kain operesen long ol rural eria olsem Midel Ramu. “Maski, mani i no inap mipela save kamapim sampela projek we em inap helpim laip bilong ol pipel long distrik na tu ol inap benefit long helt, edukesen na lo na oda,” em i tok. Sampela ol projek olsem Simbai Hai skul, Watebu Elementeri skul, Miami Elementeri skul, Wara saplai projek, haus kalabus, kot na polis edministresen, helt senta, distrik/LLG maket na sampela ol wok. Mr. Alonk husat em i vais minister bilongForen Afeas naTred i mekim tok tenk yu tu long nesenel gavman long givim DSIP mani long distrik long kamapim ol dispela projek long distrik bilong em. Em i tok tenk yu tu long nesenel gavman long bildim Baiyer-Madang Haiwe we em i sotpela rot long ol Midel Ramu distrik long kisim isi sevis na em opim dua bilong ikonomik sans na ol narapela sevis.

Joseph Dawai i raitim