OL helt wokmanmeri bai kisim COVID-19 tes olgeta  tripela de taim ol i go long wok. Deputi Kontrola bilong kontrol senta Dokta Daoni Esorom i tok ol helt wokmanmeri husat i wok insait long kontrol senta i no kisim veksin bai go long test  bihain long olgeta  3-pela de.

Dispela toktok i kamap bihain long 6-pela wok manmeri insait long COVID-19  kontrol senta long Pot Mosbi i kisim sik COVID-19. Dokta Esorom i tok wanpela bilong ol dispela lain i kisim veksin tasol ol arapela em ol lain husat i no bin kisim veksin. Dispela ol manmeri husat i kisim sik i soim olsem ol famili na ol lain husat i no kisim veksin i ken kisim sik isi tu. Dokta Esorom i tok, ” Long helpim long paitim dispela sik ol nupela protokol i bai kamap long kontrol senta. Olgeta manmeri husat i wok long kontrol senta i mas kisim namba wan hap bilong veksin long namba 31 de bilong mun Ogas. Husat ol manmeri i les long kisim veksin bai go long tes long olgeta namba tri de bilong wok. Husat manmeri i no laik bihainim dispela toktok bai no inap kam wok long kontrol senta. Ol manmeri i gat rait long mekim disisen olsem Praim Minista James Marape i tok. Tasol mipela i mas save olsem ol manmeri husat mipela i wok wantaim i gat rait tu long stap helti. “Ol pipel bilong mipela i mas tingim komyuniti na famili bilong ol na mekim  disisen. Yupela i mas go na kisim veksin long helpim long stopim sik COVID-19 long go bikepla,” Dokta Esorom i tok.

Samantha Solomon i raitim