BRINGIM praimeri helt kea sevis i go long ol pipel em i wanpela bikpela samting em bod na menesmen bilong Isten Hailans Provinsal Helt Atoriti (EHPHA) wantaim ol patna bilong em olsem Asian Divelopmen Benk (ADB),

Australia Dipatmen bilong Foren Afeas na Tred (DFAT) na Nesenel Dipatmen ov Helt (NdoH) i amamas long mekim. Long wanem, helt sevis em i mas i go long ol rurel eria we planti ol lokal man, meri na pikinini husat i save i stap long ol hauslain na viles bai i ken kisim gutpela helt sevis na ol bai i ken i stap helti, mekim wok na kamapim ol divelopmen insait long wan wan eria bilong ol. Dispela em i sampela toktok Sif Ekesekutiv Opisa bilong EHPHA Dokta Joseph Apa i bin mekim long taim bilong opisal opening bilong wanpela nupela Komyuniti Helt Senta long Musave long Kamano Namba 2 LLG long Kainantu distrik, Isten Hailans Provins. Em i tok long lukluk bilong ADB, DFAT, NDoH na EHPA, ol lokal man, meri na pikinini i save kisim bikpela taim tru long taim ol i bungim hevi na birua bilong sik. Na tu ol bel mama long taim bilong karim. Ol i save wokabaut long ol longpela rot long i go long ol etpos o helt senta long Kainantu na Henganofi long kisim sevis. “Tasol nau, dispela hatwok na hevi bilong wokabaut long ol longpela rot em i pinis. Nau mipela i bringim dispela Komyuniti Helt Senta i kam long givim sevis long yu long haus dua bilong yu long Musave,” Dokta Apa i tok. Em i tok, ADB, DFAT, NdoH na EHPHA i kamap wantaim tingting bilong kamapim 72 Komyuniti Helt Senta long Isten Hailans Provins. “Dispela tingting em i stap yet na mipela i bildim pinis foapela na openim nau tripela em long Yasubi long Okapa distrik na Jaffa na nau mipela openim long Musave. Namba foa helt post mipela bai openim em long Amaira long Okapa distrik. Wok bilong dispela projek em i kam long klostu long pinis bilong em. Dispela ol Komyuniti Helt Senta i gat ol samting we em ol bikpela haus sik i save yusim long helpim ol sik manmeri na pikinini na ol bel mama tu. Lokal MP na memba bilong Kainantu Johnson Tuke husat em minista bilong maining i tok dispela em i no projek bilong em, tasol em i amamas olsem dispela helt pos em i kamap insait long wanpela viles insait long ilektoret bilong em. “Dispela em i no projek bilong mi, tasol opis bilong mi bai lukluk long sapotim dispela helt pos, long wanem, em bai givim sevis long ol pipel bilong mi,” Tuke i tok. Em i tok amamas long long ADB, DFAT, NDoH na EHPHA long kamapim gutpela patnasip na kamapim dispela helt pos long Musave. Mani mak bilong wokim wan wan ol dispela Komyuniti Helt Senta em K5 milien kina na ADB i go pas long putim mani. Na em i kisim sapot i kam long DFAT, NDoH na EHPHA.