EDUKESEN sekta long Kokopo i kisim mani mak olsem K10 milien long European Union long mekim ol wok bilong ol Technical Vocational Center (TVET).

Dispela i kamap aninit long Papua Niugini-European Union Development Cooperation. Ol wan wan TVET i kisim mani we bai inap long helpim ol. Ol lida man bilong Is Nu Briten olsem Gavana Nakikus Konga, memba bilong Gazelle Jelta Wong ol arapela lida olsem minista bilong edukesen Dokta Uke Kombra na sekreteri bilong edukesen tu i  bin go long dispela ivent. Raval na teknikel vokesenal edukesen senta i kisim mani mak bilong K2.9 milen bilong mekim ol wok olsem  woksap, domitori, laibri na ol narapela wok bilong mekim skul i ran gut. Narapela TVET senta em Kabaira teknikel vokesenal senta bilong ol meri i kisim amni mak olsem K6.9 milen long helpim long mekim wankain wok olsem mekim nupela ol haus bilong ol tisa woksap bilong lainim ol samting na ol narapela wok tu. Dispela tupela skul i bin kisim helpim pastaim long wankain helpim long mani mak bilong K8.9 milen. Ol dispela TVET i gat inap samting helpim ol sumatin long skul na helpim long mekim ol skul wok bilong ol. Wanpela kampani bilong PNG yet Rhodes PNG i bin wokim ol haus na ol narapela wok bilong ol TVET senta long Is Nu Briten.