MOA long 8,000 man, meri na pikinini long Musave hauslain na ol arapela hauslain na ol pipel i stap
klostu long en long Henganofi distrik,

Isten Hailans bai kisim gutpela helt sevis long taim nupela
Komyuniti Helt Pos (CHP) bilong ol bai op long Fonde Ogas 12, 2021. Isten Hailans Provinsal Helt Atoriti
(EHPHA) Deputi Dairekta bilong Pablik helt sevis Kairu Opa i tok, ol man, ol pikinini na ol mama tu husat i
save wokabaut long
longpela rot long kisim helt sevis bai kisim sevis nau long haus dua bilong ol long Musave. EHPHA i bin
wok patnasip wantaim Asian Development Bank (ADB) i bin bungim ol hauslain lidaman na meri long
Musave na ol i bin wanbel long kamapim dispela CHP long Musave , long wanem, ol arapela helt senta i
stap longwe. Olsem na ol lokal pipel i wanbel na givim graun bilong ol long kirapim dispela CHP.
Dispela wanbel pasin i kamap, long wanem, ol i laikim kisim helt sevis long haus dua bilong ol. Opa i tok
dispela CHP projek em ADB i go pas long fandim na EHPHA em i patna wantaim em long putim ol
wokman na meri long lukautim. Em i tok dispel em i namba tri bilong ol foapela CHP em ADB na EHPHA i
kirapim insait long Isten Hailan provins. Tupela long ol em long Yasubi long Okapa distrik na
Yaffa long Kainantu distrik. Tupela i operet nau long givim sevis long ol lokal sik sik man, meri na pikinini.
“CHP long Musave em i namba tri we mipela bai opim long mun Ogas. Ol narapela CHP projek we bai i
kamap bihain em long Amaira long Auya na long Okapa distrik. Wok long dispela ol dispel CHP i go het
yet na mipela i lukluk long opim tu dispela helt post bipo long dispela yia i pinis,” Opa i tok.