MASKI bikpela traibel pait i save kamap long Enga provins,  edukesen em i impoten long Enga Provinsal Gavman.

Gavana bilong Enga, Sir Peter Ipatas wantaim Memba bilong Wabag Dokta Lino Tom i bin go opim dabol klasrum na laibri i kost K100,000 long Tukusenda Praimeri Skul long las wik.

Tukusenda Praimeri Skul i bin kisim K100,000 long Enga Provinsal Gavman long bildim dabol klasrum na skul laibri bikos namba bilong ol pikinini i wok long go antap.

Dispela praimeri skul em wanpela fida skul bilong Surinki Luteran Haiskul long provins.

Tukusende em ples bilong pait tasol ol viles lida na pipel bilong hap i bin wanbel na tok orait long gavman sevis i ken go insait long dispela ples.

Dokta Lino i bin mekim tok promis gen wantaim narapela K200,000 long wokim standet dabol klasrum long sapotim ol olpela infrastraksa na lukautim namba bilong ol sumatin long neks yia taim skul i op.

Ol Upper Lai-Surinki eria i bin kisim planti sevis ol i nidim we WDDA i bin givim praioriti long ol wantaim;

1. K500,000 Kinapolam Helt Senta
2. Tumilyam Helt Senta
3. Dabol stori meri domitori long Surinki Luteran Haiskul
4. Apanda- Keas rot konstraksen
5. K200,000 standet dabol klasrum na laibri long Tukusenda Praimeri Skul
6. Plen fanding bilong Yalingis Luteran Praimeri Skul
7. Plen fanding bilong Tambitanis Praimeri Skul
8. Plen fanding bilong Apanda Praimeri Skul

Jacklyn Kimala i raitim