LONG Me 12 Is Sepik Provins i tok gutbai long Sif Ekseketif Opisa bilong Is Sepik Provinsal Helt Atoriti (ESPHA) Mark Mauludu bihain long em i dai tripela wik i go pinis.

Gavana Allan Bird, Deputi Gavana David Kausik na ol Helt Bod Memba bilong Is Sepik Provinsal Helt Atoriti wantaim ol wok manmeri bilong Boram Jeneral Haus Sik na  ol kristen wantaim pablik bilong Wewak taun i bin stap long Memoriel Maru AOG Full Gospel sios na witnesim las lotu bilong late Mista Mauludu.

Gavana Bird long toktok bilong em long fiunerel lotu i tok, Nupela Boram Jenerel Haus sik bai  i op long Epril 2022 bikos long trupela lidasip bilong Leit Mauludu taim em i stap olsem Sif Ekseketif Opisa.

Gavana Bird i bin stap Bod Siaman bilong Boram Haus Sik taim Leit  Mark Mauludu i kam long Kimbe, Wes Nu Briten Provins na kisim wok long Boram Haus Sik long Wewak.

Leit Mauludu i wok klostu 40 yia olgeta long pablik sevis inap em i dai.

Gavana Bird i tok, Leit Mauludu em man bilong wok na i no save toktok planti na yumi lukim bikpela senis tru long Boram Jenerel Haus Sik na olgeta rurel haus sik long  Is Sepik provins.

“Olsem na wantaim dispela spesel luksave mi nau tokaut olsem  Is Sepik Skul Ov Nesing nau yumi kolim olsem Mark Mauludu Skul Ov Nesing”.

Long wankain taim Bod Memba bilong ESPHA na olpela Sekreteri bilong Is Sepik Gavana Chris Bais i makim Bod siaman na i tok, “Leit Mista Mauludu i man bilong givim mani ripot wantaim transparensi na i no save haitim tok we mipela i ken lukim klia mak bilong olgeta wok em mekim long en’’.