SEKETERI bilong Edukesen Dokta Uke Kombra i toksave long ol de bilong skul na nesenel eksam bilong yia 2021.

Ol de bilong stat bilong skul em; Mande 1 Februeri bilong tem 1, Mande 19 Epril bilong tem 2, Mande 12 Julai bilong tem 3 na Mande 27 Septemba bilong tem 4.

Ol de bilong pasim skul em; Fraide 9 Epril bilong term 1,  Fraide 25 Jun bilong term 2,  Fraide 17 Septemba bilong tem 3 na Fraide 10 Desemba bilong term 4.

Ol taim bilong holide em;   Mande 12 Epril i go long Fraide 16 Epril bilong tem 1, Mande 28 Jun i go long Fraide 9 Julai bilong tem 2, Mande 20 Septemba i go long Fraide 24 Septemba bilong tem 3 na Mande 13 Desemba i go long Fraide 28 Janueri bilong 2022.

Long 2021 ol tisa bai statim wok gen long Mande 25 Janueri na long 2022 em ol bai statim wok gen long Mande 24 Janueri.

Riten Ekspresen Eksam de bilong ol Gret 10 em long Fonde 3 Jun 2021 na ol Gret 12 em long Mande 2 Ogas 2021.

Ol Nesenel Eksam de bilong ol Gret 10 em; Mande 11 Oktoba i go long Fraide 15 Oktoba 2021 na bilong ol Gret 12 em; Mande 18 Oktoba i go  long Fraide 22 Oktoba 2021 na bilong ol Gret 8 em long Mande 25 Oktoba i go long Fonde 28 Oktoba 2021.

As tingting bilong skul long yia 2021 em ‘Promotim Rot bilong Gutpela Skul na Lainim bilong Olgeta’.

‘Dispela ol toksave em long tokim ol opisa bilong dipatmen, ol Tisa Sevis Komisen, ol Opis bilong Laiberi na Akaiv wantaim ol skul na institusen aninit long Nesenel Edukesen Sistem long lukim plen bilong ol’, Dokta Kombra i tok.

Student bilong UPNG Martina Takaneng i raitim