BIKPELA salens long ol papamama na yangpela marit olsem, stap nau long eduketim ol pikinini bilong yumi long haus na bai ol save long gutpela na no gut pasin wantaim.

Long olgeta yia kantri bilong yumi PNG i save selebretim Wol Intenesenel Human Raits de na em specel taim we olgeta sitisen i mas sanap wantaim long painim gutpela rot we i ken divelopim kantri bilong yumi yet wantaim Kristen pasin.

Gavana bilong NCD Powes Parkop i bin tok strong long raits bilong ol pikinini long taim bilong Wol Intenesenel Human Raits de, na salensim ol mamapapa long lainim ol pikinini long haus pastaim bihain long ol go skul.

“Mipela i mas lainim ol pikinini long ritim baibel, buk gutpela pasin bilong rispekt, daunim ol yet, no ken stil long narapela na paitim narapela long pablik hap bikos dispela i ken bringim pasin bilong vailens gro bikpela olsem na papamama tu mas no ken pait long ai bilong pikinini na yusim kain kain tok no gut bikos pikinini bai lainim,” Parkop i bin tok.

“Olgeta pikinini i gat rait long edukesen bikos ol bai divelopim kantri bihain taim olsem na bikpela wok bilong ol papamama na yangpela marit olsem, skulim ol pikinini gut na bihain bai yu amamamas,” em i tok.

Yumi laikim na karim pikinini, i no bilong go simuk maruana, na kamap strit mangi o meri olsem na taim ol liklik yet stat givim ol gutpela kaikai, skul na amamasim ol wantaim gutpela samting.

Jacklyn Kimala i raitim