KOMISINA Jeneral bilong Internal Revenue Commission (IRC) Sam Koim i bin sindaun long tupela de miting wantaim ol het bilong Asia Pasifik Takis Edministresin las wik.

Dispela miting i bin kamap onlain. Dispela grup we ol i kolim ol yet SGATAR (Study Group on Asian Tax Administration and Research) i bin kamap long 1970 na i gat 17 kantri i memba. Em ol, Saina, Japan, Filipins na Singapore. PNG, Australia na Nu Silan em ol nupela memba bilong Pasifik. Dispela miting em i namba 50 miting bilong dispela grup, tasol bikos long hevi bilong COVID-19, ol i holim miting onlain. Miting i bin kamap gut we ol Takis Edministresin long Asia Pasifik rijon i serim ol ekspiren bilong ol long taim ol i bungim hevi bilong COVID-19 i kamap long koleksen bilong takis. Antap long dispela, ol topik ol i toktok long en em takis edministresin, helpim long kisim takis namel long ol kantri na apdet bilong takis polisi na edministresin bikos long COVID-19. Mista Koim i tok dispela miting i bin kamap gut na i givim planti gutpela tingting. Long dispela taim we takis edministresin i lusim pasin bilong yusim pepa na pes tu pes toktok na i wok long yusim dijital teknoloji long mekim bisnis. Em i tok long Oktoba 2019 em i bin sindaun long wankain miting we wan wan kantri i bin givim ol apdet bilong ol long takis. Bihain long tupela yia planti senis i kamap taim gavman i muv i go long dijital teknoloji. Long taim em i givim toktok bilong long PNG, Mista Koim i tok, IRC i bin bungim planti salens long tupela yia i go pinis. IRC  i bin mekim planti disisen we i gat risk long en. Dispela em bikos bisnis bilong kisim takis i mas go het. “Mipela i kamap wantaim strongpela COVID-29 rispons bilong abrusim ol dispela salens na go het long wok bilong mipela. Maski mipela i bin gat ol COVID-19 keis, dispela i no pasim operesen bilong IRC. Bikos gavman i nidim takis long em i ran gut. Yumi mas save long rot bilong wok namel long COVID-19 na adap long ol senis i wok long kamap.” Mista Koim i tok.

Carolyne Ketsimur i raitim