PLANTI bisnis haus na ol stua na soping senta long Madang taun o sentral bisnis distrik (CBD) i save pulap tru taim em i potnait bilong ol wokmanmeri bilong RD Tuna Keneri na RD Siping.

Ol dispela lain i save pulim lain wantaim famili long potnait bilong ol i go long taun na spes long CBD long Madang i save pulap tru. RD Tuna i gat faktori bilong en i stap long not kos rot (NCR) na moa long 1,500 wok lain bilong kampani em ol meri. RD i gat arapela han kampani bilong en RD Siping long Widar we arapela 1,500 wok lain tu i stap. Taim olgeta dispela lain i kisim potnait bilong ol long kampani spes long Madang taun long ol stua i save pulap tru.  Planti taim ol i save sanapim longpela lain stret long ol stua long baim kaikai. Presiden bilong Madang  Semba ov Komes na Indastri, Kevin Murray i tok maski olsem hevi bilong sik COVID-19 i wok long kamapim pret long ol bisnis  na ikonomi bilong PNG, Madang i wok long lukim yet gro bilong bisnis bikos long namba bilong manmeri i muv i go stap long hap. Moa long en tu em muvmen bilong mani long potnait  bilong ol bisnis olsem RD Tuna i bikpela tru na i save helpim ol stua na ol arapela bisnis. Murray i tok insait long las tupela mun Madang i lukim wanpela nupela soping senta, Yaho Plaza namel long Madang CBD. Narapela nupela divelopmen em Fone Haus i go opim nupela brens bilong en long Madang.

Em i tok Madang i save lukim gutpela mani o gro bilong ikonomi bilong en long mun Epril i go inap Oktoba. Long dispela taim em ol bikpela koles na yunivesiti long Madang olsem Divine Word University (DWU) i save gat ol sumatin bilong ol i stap na ol tu i save spendim mani long ol stua na bisnis long taun. Murray i tok Madang taun i lukautim ol bikpela institusen olsem MadangTecknical College, PNG Maritime College, DWU, na Paramed na Lutheran School of Nursing em tupela nau i go aninit long DWU. “Taim moa sumatin i go skul long Madang ol i save bringim mani bikos ol i save go soping na baim ol samting long ol stua na bisnis haus long Madang,” Murray i tok. Em i tok long taim skul yia o akademik yia i pinis em ikonomi bilong Madang i save stap strong long taim bilong potnait bilong ol wokmanmeri bilong RD Tuna. Em i tok i gat ol arapela bisnis tu olsem ol lain bilong Ramu Nikel Projek na ol timba kampani husat i operet long Madang i save bringim moa mani long ikonomi bilong provins, tasol ol i no save soim ples klia tumas. “Taim ol RD Tuna wok lain i kisim pe long kampani wik na laik go long taun long mekim soping, em ples save pulap tru bikos ol famili memba olsem pikinini, mama, papa na ol tumbuna na tu ol arapela lain i save pulim lain long go long taun,” Jim Tela, wanpela sekyuriti opisa bilong Raibus Sekuriti Sevises Limited (RSSL) i tok.

James G. Kila i raitim