INDEPENDENT Consumer and Competition Commission (ICCC) i tokaut olsem bai prais bilong fiul i go daun bikos ristriksen bilong trevol we i kamap long hevi bilong COVID-19.

Komisina na Sif Ekseketiv bilong ICCC, Paulus Ain, i tok COVID-19 bai afektim trevol na dispela i bai daunim diman bilong fiul. “I luk olsem prais bilong fiul bai go daun bikos long ristriksen bilong trevol long dispela taim we COVID-19 na Delta Variant i kamap strong,” em i tok. Em i tok PNG em “price taker” o i min olsem em i kisim tasol wanem prais narapela kantri i givim bikos kantri i save impotim fiul. PNG i no save putim prais bilong fiul em yet, nogat. Domestik prais bilong fiul long PNG em i dipen long wol prais bilong wel. Tasol long dispela mun, ritel prais bilong fiul i go antap bikos prais bilong impotim ol petroleum prodak i go antap. Prais bilong fiul long dispela mun em K3.79, disel K3.28 na kerosin em K3.01. Mista Ain i tok ol Public Motor Vehicles (PMV) i mas no ken putim hevi long ICCC long ol dispela prais bikos em i no stret. Em i tok ICCC i save senisim reit bilong ol PMV insait long wanpela yia bihainim ol senis i kamap long Jeneral Prais Level na kost bilong disel.