NUPELA ol sek poin infrastraksa long Mano we i stap long boda bilong Usino-Bundi, Madang na Raikos distrik long sekim ol lain i go aut long Madang long banisim sik bilong Bogia Kokonas Sindrom (BCS) i wok pinis.

Dispela sek poin em Kopra Indastri Koporesen (KIK) aninit long Nesenel Egrikalsa Kwarintin Inspeksen Atoriti (NAQIA) i go pas wantaim ol arapela lain ejensi i menesim. Dispela sek poin pastaim i bin stap klostu long Tapo wara tasol KIK i muvim dispela sek poin bikos ol i wokim bikpela nupela bris long Tapo wara. KIK Risets na Ekstensen Menesa, Dokta Eremas Tade i tok BCS em sik nogut we i kilim dai planti kokonas diwai. KIK wantaim ol saveman bilong Dipatmen ov Agrikalsa na Laipstok (DoA) na NAQIA i wok bung long banisim sik i go aut long Madang. Presiden bilong Usino LLG, Peiwa Aimai i tok sek poin bai givim sans long ol lokal pipel long wokim ol spin-ov bisnis olsem salim ol kaikai na ol samting taim ol manmeri i stop long Mano sek poin. Arere long sekim BCS long ol kokonas KIK wantaim ol patna ejensi bilong em bai i kisim taim tu long sekim ol arapela samting nogut olsem ol drag o samting bilong birua olsem masket i go aut. Dokta Tade i tok ol fama long Madang provins i wok long lusim samting olsem 2.7 milien kokonas long olgeta yia  long han bilong ol baiya bilong Hailans rijon. Dispela em olsem K2.7 milien sapos ol i salim wan wan kokonas long K1. Dokta Tade i tokaut olsem ripot KIK i kisim bihain long 8-pela yia taim wok bilong sekim ol lain i go aut long Madang long Tapo sek poin we NAQIA i putimaut i soim olsem long wan wan mun samting olsem 225, 000 kokonas i go aut long Madang provins na go long Hailans rijon. Em i tok insait long wanpela yia dispela i kamapim total olsem 2.7 milien kokonas. Dispela i olsem K2.7 milien i go aut long Madang provins sapos ol i salim ol long K1. Dokta Tade i tok tasol dispela win mani i ken go antap sapos ol i salim long prais antap long K1. Em i askim ol lokal kokonas fama long Madang long luksave long veliu bilong kokonas na i no ken salim wan wan kokonas long 30 toea na 50 toea.

James G. Kila i raitim