LONG taim namba bilong manmeri i wok long go bikpela long wan wan yia, kain mak bilong sevis i go long ol i wok long sot.

Dispela i wankain long mak bilong kaikai manmeri i kisim, moa long sait bilong abus. Memba bilong Tewai-Siassi, Dokta Kobby Bomoreo, i luksave long dispela laik na askim Distrik Divelopmen Atoriti long las mun long makim K2.4 milien long sapotim egrikalsa sekta. Dispela mani bai bungim kostu bilong trenspot long bringim ol kau long ol helpim ol manmeri husat i gat laik long lukautim kau. Em i tok ol projek olsem Wafi Golpu Main na ol arapela bikpela projek i wok long kamap na laik bilong kaikai abus bai bikpela. Em i tok em i gutpela long redi bipo long ol bikpela projek i stat.

Em i plen tu long strongim wok bilong lukautim kakaruk long kamapim abus na kiau. Tewai-Siassi Distrik Divelopmen Koporesen bai lukautim dispela mani. Dokta Bomoreo i tok arere long laipstok, ol arapela hap K2.4 milien mani bai go em long sapotim wok bilong kaukau, kopi na kopra. Em i kisim dispela taim long strongim toktok bilong gavman long sapotim egrikalsa sekta. Em i tok Marape Basil i surukim yet tingting bilong groim na strongim egrikalsa sekta. Em i tok 85 pesen bilong manmeri i stap long rurel komyuniti we ol i stap long strong bilong egrikalsa. Em i tok taim gavman i strongim egrikalsa, dispela bai strongim ol pipel na ol bai strongim ikonomi bilong kantri. “Yu ken traim na askim wanpela man o meri bilong Papua Niugini long ol arapela wok sapos ol i save o nogat,” em i tok.

“Tasol yu askim ol long wok bilong egrikalsa, ol bai smail na lukluk long yu na tok yu mas paul o longlong. “Wok bilong egrikalsa i stap insait long laip bilong ol manmeri, long egrikalsa ol i stap.” Long wankain taim, Jawad Khan, wanpela opisa bilong wanpela divelopmen-maket Gavman bilong Australia i tokaut long sapot em i givim long egrikalsa long kantri. Em i tok em i kamapim NKW fres kampani long sapotim ol fama long salim ol produs bilong ol i go aut.

Em i tok kampani i kamapim rekot we i soim ol fama na hamas ol samting ol i groim na salim. Em i tok kampani i trenim 700 manmeri pinis na nau yet i trenim 250 manmeri klostu long Hidden Veli Gol Main long Wau, Morobe Provins. Kampani bai go aut na trenim tu ol fama long ol narapela ples.

Paulus Tali i raitim