PRESIDEN na CEO bilong Barrick Gold, Mark Bristow i kam long PNG long dispela wik wantaim ol senia Barrick Gold Ekseketiv long mekim riviu long main sait.

Dispela em hap bilong wokabaut em bai mekim long Wol long operesen bilong Barrick. Long dispel wokabaut bilong em, Dokta Bristow bai bung wantaim Praim Minista na ol senia PNG Gavman opisa. Long dispela taim we Porgera main i stap yet long mentenens, ol negosiesen toktok i wok long go het yet bilong opim bek Porgera main.

Ol dispela negosiesen i go wantaim fremwok agrimen we Barrick na Gavman i bin sainim long Epril long dispela yia. Dokta Bristow i tok visit bilong em bai helpim dispela negosiesen long go het na abrusim ol taim nogut. Na em i hop bai ol i sainim agrimen bilong opim main klostu taim. Em i tok moa olsem Barrick i sanap strong long opim bek Porgera main aninit long fremwok agrimen bilong en. Em tok olgeta pati i mas wokbung wantaim long mekim fainal negosiesen bai main i ken op na statim operesin na kontribiut i go long ikonomi bilong PNG long dispela taim bilong COVID-19. Bihain long olgeta negosiesen na agrimen namel long Barrick na Gavman i pinis, kampani bai stat mekim rikrutmen proses na bai putim long websait, sosol midia na kampani stetmen.