Carolyne Ketsimur i raitim FOOD and Agriculture Organization (FAO) bilong United Nations (UN) aninit long program bilong EU-STREIT PNG i karimaut 12-pela trening bilong ol fama long Sandaun Provins.

Ol dispela fama i save dipen long kakao na vanila. Dispela trening bai givim ol impoten save, skil na teknik bilong impruvim wok bilong kakao na vanila. Ol 1,418 fama na ol lida fama long 9-pela rimot ples long Provins i bin kisim dispela trening. Insait long ol dispela fama, em ol 357 lida fama bilong vanila tu i bin kisim trening bilong vanila kaltivesen. Dispela trening tu i givim save long ol fama long kamap ol lida trena na go trenim moa long 14, 000 fama long Sepik rijon. EU-STREIT i wok wantaim Kakao bod na dipatmen bilong Egrikalsa na Laipstok opisa long Aitape-Lumi distrik. “Ol patisipen i kisim trening na bihain ol i go wok long ol blok kakao bilong ol na long wankain taim trenim 10-pela fama insait long ol komyuniti bilong ol,” Nesenel Kakao Prodaksen Opisa, Michael Lames i tok. Planti fama i tok em namba wan taim ol i kisim dispela kain trening. Na ol i tok dispela trening givim ol planti nupela save na skil we ol bai go aplaim long ol kakao blok bilong ol. EU-STREIT i givim tu ol 18 kainkain kakao pod bora sid we binatang bora i no inap bagarapim. “Mi na ol brata bilong mi i laik senisim ol kakao we binatang bora i bin bagrapim wantaim ol nupela sid we bai kamap gut na givim moa mani long 2 i go long 3 yia i kam. Mi amamas tru long dispela gutpela helpim mipela i kisim,” Rosa Albert, wanpela fama meri husat i wanpela bilong ol 75 meri i bin kisim trening.