PAPUA Niugini Semba bilong Main na Petroleum i tok amamas long MarapeBasil gavman long gutpela eksen we mekim long ol risos projek long kantri we bai sapotim kantri long muv i go long narapela level na wankain taim sapotim ikonomi bilong en.

Gavman i bin paitim tok i go kam na i tok orait long senisim Wel na Gas Papua LNG  Projek bil, 2021. Ol 79 memba i bin vot na tok orait long dispela. Presiden bilong Semba, Anthony Smare i tok, “Dispela rot gavman i kisim i soim olsem em i gat bikpela komitmen long Papua LNG Projek. Olgeta memba i luksave olsem Papua LNG Projek i mas go hetim wok bilong strongim ikonomi bilong kantri, givim moa sans wok na bisnis long sapotim ol pipel.” Mista Smare i tok amamas long Petroleum Minista, Kerenga Kua long tokaut klia tu long ol kost i stap long dispela projek. “Mani we PNG LNG Projek bai mekim em sanap olsem 10 bilien US Dola i go long 12 bilien US Dola. Dispela mani em bikpela tru na yumi ken yusim hap long bekim ol dinau bilong gavman,” Mista Kua i tok. Mista Smare i tok amenmen bilong bill bai helpim long impruvim konfidens long ol investa long risos sekta.