LAS wik i  wanpela miting i bin kamap long Kokopau long Not Bogenvil namel long ol pipel bilong Selau/Suir na Saut Bogenvil husat i save wok na stap long Kokopau taun.

Long dispela miting, ol sif bilong Selau i bin mekim sampela askim i go long ol lain bilong Saut Bogenvil. Wanpela bilong ol dispela askim em long givim bek Landcruiser kar bilong JODASH HIRE CARS we wanpela man Siwai i bin eksiden wantaim. Dispela kar i bin stap long haia bilong ol gavman opisa husat i bin go long Siwai Turisim na Kalsarel So. Ol i holim yet dispela kar. Ol lokal sif i bin traim long kisim dispela tasol ol i no win. Miting i bin kamap long Kokopau bikos em i namba tu taim nau ol i atekim papa bilong JODASH HIRE CARS na tu ol i bin go bagarapim opis bilong em long bihain long eksiden i bin kamap long dispela man Siwai. JODASH HIRE CARS i save givim gutpela sevis long planti bisnis lain na moa yet gavman bilong ABG long  trenspot. Dispela nogut pasin i kamap na papa bilong kampani i no amamas bikos kain nogut pasin i putim operesen bilong kampani long hevi. Kampani em bilong lokal man Selau na i no luk gut taim lain bilong narapela hap i kam bagarapim kampani i wok long asples bilong en. Ol ABG memba bilong Not Bogenvil i stap na toktok long dispela miting wantaim ol meri lida na ol ripresentetiv bilong sios. Sif Peter Manuka husat i bin bekim ol toktok bilong ol lida i tok ol dispela pasin nogut i kamap long raskel na ino ol gutpela bisnis lain bilong Saut Bogenvil we i operet long Kokopau. Em i tok dispela meta em bilong Polis, maski nem bilong ol lain i mekim dispela pasin nogut i go pinis long polis i nogat samting i kamap yet long holim ol. Ol i raun fri yet. Mista Manuka i tok ol lida bilong Saut Bogenvil bai bung na lukim ol dispela lain gen. Long wankain taim em i tokaut klia olsem graun long kokopau em long papagraun yet i salim. Sapos ol i les long dispela bikhet pasin ol i mas noken moa salim graun.