MINISTA bilong I n f o m e s e n , Komyunikesen na Teknoloji, Timothy Masiu i tok em i raitim wanpela pas i go long Sif Ekseketiv Opisa bilong NICTA na Dairekta bilong National Intelligence Organisation (NIO) long mekim sekyuriti asesmen long olintenet sevis provaida na klaud sevis provaida we i gat laisens pinis.

Mista Masiu i tok pasin bilong holim strong lo na lukautim sekyuriti bilong kantri em i wok bilong gavman na dispela i go tu long ICT sekta long PNG. Olsem minista na man i lukautim ICT sekta, Mista Masiu i toktok strong long olgeta pipel i mas bihainim NIO Ekt 1984 aninit long seksen 38 na 39 na Nesenel Infomesen na Komyunikesen Atoriti Ekt 2009 aninit long seksen 72. “Em i wok bilong mi long lukim olsem olgeta memba bilong bod na menesmen bilong intanet, klaud na getwe sevis provaida mas gat rait long eksesim infomesen wantaim kontrol,” em i tok. Mista Masiu tok Marape-Basil gavman i wok long tok orait long ol foren dairek invesmen long ICT sekta long PNG, tasol gavman tu i mas lukautim nesenel sekyuriti bilong kantri. “Yumi mas divelopim, mentenim na go het long impruvim nesenel sekyuriti asesmen sistem na proses long kantri bilong lukautim ol dijital infrastraksa sistem bilong gavman na infomesen bilong ol pipel. Long wankain taim, ol pipel bilong PNG tasol i ken yusim ol dispela infomesen.” Mista Masiu i tok. Mista Masiu i amamas olsem ol NICTA i wokim gutpela wok long bihainim ol lo na oda bilong Nesenel sekyuriti na em i askim NICTA long go het long mekim dispela gutpela pasin.

Carolyne Ketsimur i raitim