Madang Resort Hotel long Madang i mekim histori long Madang las wik taim olgeta wokmanmeri bilong
en i kisim namba tu AstraZenecca veksin.

Menesing Dairekta bilong dispela Resort Hotel Sir Peter Barter i amamas long ol wokmanmeri bilong em
na tok, “Dispela disisen ol wokmanmeri i mekim
em i wanpela disisen we ol i no tingim ol yet tasol bilong gutpela bilong kantri.” Em i tok, “Dispela pasin i
ken bringim kantri i go bek long nomol.”
Em i wanpela gutpela samting tru wanpela kampani i ken mekim long PNG na emiI soim yupela i sanap
strong long pinisim COVID-19 vaires long PNG, Sir Peter i tokim ol wokmanmeri bilong em. Long ol mun i
go pinis Madang Resort Hotel i bin wok bung wantaim kamapim wanpela liklik infomesen buk we i bekim
sampela askim we ol pipel i gat. Dispela liklik buk tu i helpim ol wokmanmeri long kisim kliapela tingting
na save long COVID-19 na ol i ken mekim disisen bilong ol yet long kisim veksin na banisim ol yet.
Madang Resort Hotel i holim tu wanpela woksap long COVID-19 long Madang wantaim wanpela speselis
bilong PNG Institut bilong Medikol Risets (PNGIMR) Dokta Livingstone Tavul. Dokta Tavul em i wanpela
speselis husat i bin wok long Vector Borne Disease Unit long PNGIMR. Dokta Martin Damien wanpela
dokta long Madang Jeneral Haus Sik i amamas tu long ol wokmanmeri bilong Madang resort long sanap
long banisim COVID-19 long Madang. Long dispela taim tu bipo Mis Pasifik Ailan Leoshina Kariha husat i
stap long Madang long lukim Mista na Mis Madang Pegien i kisim namba wan AstraZenecca veksin
bilong em. Em i wanpela bilong ol 257 sumatin long Divine Word University husat i kisim veksin. Mis
Kariha i tok olsem em i hop olsem planti arapela kampani na institusen bai i bihainim dispela gutpela
piksa Madang Resort Hotel i soim.