DISPELA em ol rekomendesin we i bin kamap long strongim Stret Pasin Stoa (SPS) program long kamap sastenabol.

• Stopim ol foren bisnis long gro insait long kantri na kamap wantaim lo bilong givim sans long ol lokal long ranim bisnis
• Apim baset bilong SME bilong wanpela yia long K200 milien i go long K1 bilien, opim dinau maket na daunim proses bilong kisim dinau.
• Sapotim SPS program wantaim ol komplimentri insentiv olsem takis kredit na freit sabsidi.

Nesenel Risets Institiut (NRI) i bin autim wok painimaut bilong em long program “Stret Pasin Stoa” long Tunde 1, Jun 2021. Long dispela bung, Thomson Honga na Dokta Francis Odhuno i bin tokaut long wok painimaut ol i bin mekim long dispela program.

 Stret pasin stoa (SPS) em program we i bin kamap long yia 1970 bilong sapotim ol stoa bisnis bilong Papua Niugini. Program i bin givim mani na trening bilong menesim bisnis na sapotim ol bisnis long sanap strong long ol yia 1970, 1980 na 1990.

 Mista Honga na Mista Odhuno i bin laik painimaut sapos SPS program i bin kamapim gutpela samting long ol lain husat i bin kisim helpim long dispela program.

Long taim bilong stadi, 8-pela lain husat i bin kisim helpim long SPS program i tokaut olsem program i bin helpim ol gut tru long groim ol bisnis bilong ol na helpim ol long sapotim ol famili. Ol i tok program i bin helpim long groim ol lokal bisnis long PNG na ol i askim olsem dispela program i mas kirap bek.

Papua Niugini tude i no balens long ol ikonomik ektiviti bilong em. Ten pesen tasol bilong ol bisnis em i bilong ol PNG manmeri. Na dispela i no inap long sapotim driman bilong gavman long kisim bek PNG. Sapos namba bilong ol bisnis we ol pipel bilong ol PNG yet i papa long em i go antap, kantri bai i ken sanap strong em yet.

SPS program i gat gutpela sans long promotim ol lokal bisnis. Bikos em bai sapotim ol lain husat i no gat i nap mani long lukautim ol famili bilong ol na tu helpim ol liklik bisnis long gat ekses long fainens.

Wanpela bikpela salens bilong SPS long tude em graun bilong sanapim ol bisnis. Sapos SPS i statim operesen bilong em, planti manmeri bai gat bikpela sans long gat bisnis. Tasol bai no gat spes bilong operetim ol dispela bisnis.

 Long PNG, 3 pesen tasol bilong graun em gat taitol na 97 pesen em i kastomari graun. Olsem na gavman i mas painim rot bilong kliaim dispela bikpela graun we ol pipel i ken yusim long ranim ol bisnis na kisim bek PNG.

Carolyne Ketsimur i raitim