WOL Benk i apruvim pinis K105 milien projek long helpim PNG Power Ltd long apim sevis bilong pawa saplai long kantri.

Dispela helpim bilong PNG Energy Utility and Reliability Improvement Project (EUPRIP) i kam long taim we ol pipel na bisnis long Papua Niugini i save pilim hevi tru long ol blakaut i save kamap klostu klostu.

Ol dispela blakaut i save pasim wok kamap bilong sampela kritikel sevis we ol pipel na bisnis i mas kisim o givim.

Insait long Eneji sekta na lukluk go bek long 1970 i kam antap dispela em i wanpela bikpela sapot tru Wol Benk bai i mekim. Dispela projek bai i stat long dispela yia inap 2026.Ol wok kamap long dispela projek bai i helpim PNG Power Ltd long sanap strong na mekim mani, long kamapim ol praivet invesmen insait long eneji sekta, Na tu Wol Benk i laik helpim gavman bilong PNG long givim ekses long pawa 70 pesen bilong populesen long kantri. Em wokmak inap 2030 bihainim Divelopmen Strateji Plen bilong PNG bilong 2010-2030.

Wol Benk i amamas long wok bung wantaim ol divelopmen patna olsem PNG Power Ltd, Kumul Consolidated Holdings, PNG Gavman na gavman bilong Australia.