LAS wik National Superannuation Fund Ltd (Nasfund) i joinim wol long amamasim Intanesenel De bilong ol meri.

“Long dispela taim, mipela i luksave na selebretim ol win bilong ol meri insait long olgeta hap bilong wol. Moa yet long kantri bilong yumi, Papua Niugini” Sif Ekseketiv opisa bilong Nasfund, Ian Tarutia i tok.

Hettok bilong dispela de bilong ol meri em “Achieving an equal future in a COVID-19 world- leading by example” o ol meri i go pas long soim ol arapela long kamapim wankain na gutpela taim bihain long taim bilong COVID-19.

Nasfund i tok em i promotim na tok tenkyu long sapot na hat wok bilong ol meri insait long ogenaisesin. Em i sapotim veliu bilong divelopim na luksave long jenda ikwiti long taim bilong givim tingting.

Na long wankain taim i komitet na i gat luksave olsem ol meri i ken kisim ol sinia lidasip wok. Insait long olgeta ogenaisesin, ol meri i soim olsem ol i ken sanap strong na wok.

Long brens level, namel menesmen  , sinia menesmen, ekseketiv menesmen na bod, mipela i komitim mipela long promotim envairomen we ol meri i ken kontribiut i go long Fand na ol memba insait long Papua Niugini.

Mipela i tok tenkyu na luksave long kontribiusen bilong ol meri long taim bipo i kam inap nau long dispela taim.