OL SINIA lain menesa bilong Ramu NiCo Menesmen (MCC) long Madang  taun i bin guria stret long Tunde moning long samting olsem 10 klok taim wanpela grup i go long opis bilong ol wantaim 10-pela pato.

Ol dispela lain husat i bringim  pato i go long MCC ‘glas haus’ long Madang em ol wokmanmeri bilong Raibus Enjiniaring Limited (REL). Na dispela 10-pela pato ol i bringim em presen ol i givim long ol lain Saina wok lain bilong Ramu NiCo (MCC) long amamasim Spring Festival o Nu Yia bilong Saina. Nu Yia bilong ol Saina bai stat long tude Fonde, Februeri 11, 2021.

REL em wanpela lenona kampani husat i gat kontrak wantaim MCC long sait long jenerel leba na plaming, klining na mentenens sevis long ol wok operesens sait bilong kampani long Kurumbukari Main, Basamuk Rifaineri na Madang Bes long taun.

Ramu NiCo (MCC) Asisten Presiden, Meng Deyong wantaim Koporet Opis Jeneral Menesa, Charlie Hu i amamas tru long kisim ol pato long ol REL lain husat i mekim danis na singsing wantaim na bringim i go long han bilong ol MCC bos lain.

Jeneral Menesa bilong REL, Brodney Seip wantaim HR tim bilong em olsem Angelyn Mondu na Elizabeth Tuiya i tok olsem  REL i save givim pato olsem presen i go long ol Saina wok lain long KBK Main na Basamuk Rifaineri long pastaim long amamasim ol lain husat i save helpim ol long sait long wok bisnis.

Mista Seip i tok dispela presen ol i givim long MCC long Madang em namba wan taim tru na ol i luksave olsem Spring Festival o Nu Yia bilong Saina bai kamap long Fonde olsem na dispela presen ol i givim em spesel stret.

Mista Meng i makim MCC long tok tenkyu long ol REL wok lain long pato na em i tok pato em wanpela pisin we i spesel long kaikai bilong ol lain Saina na ol bai kukim gut stret na serim na kaikai na amamas long Spring Festival.

James G. Kila i raitim