National Agriculture and Research Institute (NARI) i mekim wanpela projek bilong lukautim kainkain kaukau i stap insait long kantri bilong yumi.

Kaukau em wanpela nambawan kaikai bilong ol Papua Niugini long sait bilong nutriens, ikonomi na sosio-kalsa benefit long bipo yet kam inap nau.

Taitel bilong dispela projek em ‘lukautim na mekim gut yus bilong kaukau long Klaimet Smat Egrikalsa insait long Rurel Papua Niugini Komyuniti na bai stap yet long narapela 4-pela yia.

Dispela projek em ol International Treaty of Plant Genetic Resources (ITPGR) bilong Food and Agriculture Organisation (FAO) i go pas long en.

Dispela projek em ol bai mekim long Sentral, Morobe, Madang na Isten Hailans Provins.

Astingting bilong dispela projek em long soim ol fama long lukautim na mekim gut yus long kaukau olsem Plent Genetic Resources for Food and Agriculture (PGRFA).

Dispela projek em bai sapotim, soim, skelim na helpim kamap bilong kaukau na infomesen pepa bilong sampela pasin bilong ol kaukau we ol kaltivas bai stadi long em.

Go moa yet i gat sans bilong dispela projek wok we em bai helpim gut wok bilong institut long mekim gut wok na painimaut long PGRFA na ol samting bilong wok.

Dispela mas mekim na soim gutpela risal long sait bilong menesmen, lukautim bilong kaukau na wok bilong skelim tu.

Ol bai skulim tu ol komyuniti na ol fama long save bilong lukautim na yusim gut kaukau insait long dispela projek.

Namba wan ol patna bilong ol em, em  PNG University bilong Technology wantaim ol narapela liklik komyuniti skul, non-gavman ogenaisesen na sios tu bai helpim.

 NARI risets senta long Lae, Momase Rijonel Senta na Aiyura, Hailans Rijonel Senta ol i go lukim pinis ol komyuniti bilong ol na ol i soim olsem ol i redi long statim dispela projek.

UPNG Jenelis Sumatin Martina Takaneng i raitim