OL 63 fama long Westen Hailans i bin kisim Famili Fam Tim (FFT) trening las wik.

Centre for
Excellence in Financial Inclusion (CEFI) i bin ranim dispela trening wantaim helpim bilong patna
bilong em, Peoples’ Action for Rural Divelopmen (PARD).
Astingting bilong trening em long skulim ol go pas o lida fama long famili faming bai ol i kisim save
na wok wantaim ol narapela fama long ples na redim maket bilong olgeta fama.
Ol lida fama i kisim save bilong stretim ol gol bilong ol famili, mekim baset bilong famili, rot bilong
menesim mani na ol rot bilong wokbung namel long ol famili memba. Ol i kisim save tu long ol wok
we wan wan man na meri long famili i mas mekim.
FFT trening bilong ol lida fama em hap bilong bikpela FFT trening CEFI wantaim ol narapela patna
olsem, Care International PNG bai karimaut aninit long Market for Farmers Projek (MVF), we PNG
gavman na International Fund for Agricultural Development (IFAD) i fandim.
Spesel Projek Menesa bilong CEFI Busa Jeremiah Wenogo i tok trening bai helpim ol fama long redim
ol yet long go insait long patnasip wantaim ol Fres produs baia. Dispela trening em impoten tru long
ol lida fama bikos ol bai stap namel long stretim maket namel long ol arapela fama na ol baia.
Wanpela lida fama, Martha John i tok Famili Fam trening i opim ai bilong ol. Em na famili bilong em i
save wokim faming moa long 10-pela yia nau.
“Ol fama i no save long hamas mani ol i save mekim taim ol i maket. Ol famili i nogat visen, ol i nogat
baset, tasol taim mipela i kisim FFT trening, mipela i lainim planti gutpela samting. Kain olsem, rot
bilong kauntim maket mani na luksave long winmani na lusmani, na long sevim mani long benk long
yusim long taim bihain,” Martha i tok.
Trening bilong ol lida fama long Simbu na Jiwaka bai kamap long Jenuari 2021 na tu ol lida fama na ol
baia bai sainim fomal patnasip agrimen long wankain taim.