Memba bilong Saut Bogenvil na Minista bilong Infomesen ns Komyunikesen Teknoloji, Timothy Masiu i givim K150,000 long kamapim gut pawa saplai long Buin taun.

“Mi amamas long givim dispela mani long kamapim gut pawa saplai long Buin taun. Mi laikim olgeta pipel i ken kisim pawa na yusim long haus na long ranim ol bisnis bilong ol. Mista Masiu it ok.

“Long taim mi bin winim ileksen, mi bin tok bai mi senisim Buin taun  kamap bikpela taun long Bogenvil. Olsem na nau mi amamas long givim mani long kamapim gut pawa saplai sistem na helpim Buin long kisim dispela driman,” em i tok.

Mista Masiu i tok moa olsem, Buka taun i no wok long gro bikos long hevi bilong pait long graun. Na Arawa tu i stap olsem yet bihain long kraisis i bin bagarapim.

Em i tok Buin i gat bikpela stet graun inap long 280 hekta we mipela ino divelopim yet.

Mista Masiu i tok, gavman i laikim helpim bilong ol pipel long bringim divelopmen long Bogenvil . Ol papagraun i mas givim sampela graun bilong ikonomik divelopmen.

“Long taim mi stap memba mi bai wok hat long bringim 24 aua pawa long Buin na bai planti bisnis i kam kirap long Buin.” Mista Masiu i tok.

“Mi bai bringim rurel ilektrifikesen long ol ples tu. Mi stat pinis long Mamaromino na bai mi go het long ol narapela ples long Karuru na Morou.” Em i tok.

Mekai Hubert husat i go pas long wok bilong putim pawa saplai i tok wok nau i redi long go het wantaim helpim bilong Minista Masiu.

Mista Masiu tok tenkyu tu long helpim bilong bipo memba Joe Lera husat i sanap nau long presiden sia long AROB 2020 ileksen.

Dispela K150,000 em i hap peimen bilong K1 milien pekej we Saut Bogenvil Distrik Divelpomen Atoriti i givim tok orait long en.

Carolyne Ketsimur i raitim