DEPUTI Siaman bilong Oil Palm Indastri Koporesen (OPIC) na Siaman bilong Popondeta Oil Palm Groas Asosiesen, Arnold Koko i no amamas na tokaut olsem ol pipel i save planim Oil Palm tasol i save ronim dispela Indastri long hatwok mani bilong ol.

Em i tok long dispela yia tasol gavman bilong Marape-Steven i bin givim wanpela K3 milien tasol we ol i bin yusim lo ol rot tasol.

“Pastaim long Kofi Indastri Koporesen long pastaim, ol memba bilong palamen i putim han bilong ol long dispela Indastri na ol i bin bagarapim dispela Indastri. Mi no laikim Oil Palm Indastri lKoporesen long go insait long dispela problem tu,” Mista Koko i tok.

Em i tok ol pipel i save bungim mani olsem wanpela kwata ol i save givim K4 we K3.50 i save go long ol OPIC projek long Popondeta, Milen Be na Wes Nu Briten na 50toa i save go long OPIC hetopis long Pot Mosbi.

Mista Koko i tok, “Nesenel gavman i nogat kontribusen bilong ol long dispela Indastri. Las yia tasol, gavman bilong Peter O’Neill i bin givim K13 milien, dispela mani ol i bin yusim long mekim rot.

Dispela yia, gavman bilong Marape-Steven i givim K3 milien we mipela i ting ol bai givim K20 milien. Dispela K3 ba mipela givim long wanem provins.

“Ol memba bilong palamen i mas noken putim nus bilong ol long bisnis bilong mipela, gavman i nogat mani bilong ol long dispela Indastri,” Mista Koko i tok.

Long las wik Fraide, tripela member bilong Oil Palm Asosiesen i bekim leta bilong Egrikalsa Minista, John Simon long tok aut long wanem as ol i no bin go long Bod miting.

Charlpetson Koi i raitim